蔡潤記

Open Now

Now Closed

大埔區係少數仍然保留住舊區色彩的地方，小店食肆琳瑯滿目，各適其式。識食一定去小店食，識揀一定揀蔡潤記。蔡潤記都可以算係大埔出曬名嘅粉麵專家，魚蛋魚片唔在講，牛腩粉腸都好出色。由於店裏面人多擠擁，幾乎任何時間都爆場，等待食物都需要一點時間，不過耐心等侯都係值得。今日點左一碗魚蛋牛腩河同一碟魚皮。首先，炸魚皮同坊間一般薄魚皮好唔同，厚身鬆脆，略帶咸香魚鮮味。好多人都話好硬，好難咬，其實食法係應該浸湯，吸收湯既精華再食，軟硬交雜嘅口感，必定一試難忘。魚蛋則屬於細粒類型，彈牙爽口，魚味不太濃，依舊保持舊有高水準。牛腩肥瘦適中，略帶油香，味道香濃，濃湯配合滑溜河粉，認真一絕。重點自家秘制辣椒油係必食推介，加點豉油，無論魚蛋魚片牛腩粉腸河粉，都配合得天衣無縫，畫龍點精一樣。總括來說，有質素的傳統香港特色食物買少見少了，大埔區算係少數仍然保留住呢方面食物的地方，大家應該好好珍惜，多多支持。最後提一提，蔡潤記3點關門，要食嘅請早啦。