石之牛石板日式料理 (Closed)

石之牛位係主打自助石板燒嘅餐廳，位於深水埗，距離地鐵站只有5分鐘步行距離，都好方便。今次我哋去試下佢嘅晚餐，石板燒嘅特色係可以自己控制肉嘅熟度，豐儉由人，淨係石板牛類已經有6款選擇咁多，如果唔鍾意食牛，仲可以揀其他石板類，有羊架、鰻魚、雞扒同豬腩片。今次我試咗和牛同牛小排，套餐真係非常抵食，包日本薯條同粟米，另外仲有個迷你沙律吧，日本珍珠白飯、羅宋湯同沙律菜都可以無限追加，一定夠飽肚🤭和牛差唔多係餐廳最貴嘅牛扒套餐，果然冇令我失望，牛肉質量好好，咬落去好嫩滑，而且燒得岩岩好，入口即溶，保留咗牛肉嘅鮮味，配上黑椒醬，零舍好味😋石板燒牛小排都唔遜色，大大份份量好足，肉質鮮嫩多汁，每一啖都好好味，蒜蓉汁都有驚喜，好香，醒胃又惹味。沙律菜新鮮爽脆，配上特製嘅沙律醬，真係好開胃。另外要一讚佢嘅羅宋湯，入面真係有湯料，辣辣地都好入味，我忍唔住飲咗好多碗😂自助嘅石板燒牛扒餐廳喺香港真係唔多，石之牛唔單止價錢平民化，而且牛肉質量好好，餐廳環境舒適，值得推介。石之牛石板日式料理 📍深水埗元州街153號新元州大廈地舖