船皇 (厚福街) (Closed)

厚福街不嬲好多美食餐廳選擇，同朋友商量後，最後揀左呢間，但係一試難忘，唔會再返黎食。唔太肚餓，所以叫個麵同串燒，諗住分享食，唔夠都可以追加，點知最後出去搵其他野食填肚。船皇湯麵，金邊粉，加$1升級和牛，落單時店員話無牛丸，會換另一樣，但無得揀既，換咩就佢地自己話事。和牛少到好難搵，又細塊，都算了，仲要係無牛味咖。金邊粉幾好食既，不過配菜無一樣野出色，認真一般。串燒方面，初初以為同價可以混，點知落單時，店員話規定唔畀混，按原價計算，咁就叫曬三串雞肉，到一上菜，嘩！啲雞肉好耹貴呀，之前食開既串燒，全部都多過佢，份量少都算，仲要完全無沙嗲味。佢個飲品未擺上檯之前，我地以為係串燒跟既沙嗲醬定咩，點知一擺底。。。嘩！個飲品大碗到驚人，兩啖吸曬，一開始青檸味都有既，冰冰凍，但後來被冰搞到好淡，無曬味，不過始終只係 $15，無得要求咁多，有野飲下已經值得感恩。其實尖沙咀黎講，價位真係唔貴，仲可以叫幾平添，但店員態度真係好一般，食物品質亦好一般，飲品亦好一般，我同個朋友仔都食到怨聲載道，最後我地都食剩好多野，真心唔值得我再返黎食。