叄嵐日本燒鳥串燒居酒屋 (Closed)

位於灣仔不起眼嘅後巷，日式居酒屋小店門面清新，見餐牌幾吸引，價錢唔算貴，人又唔多，就入去試下。坐低諗好食咩，等左一陣，至明白係自助點餐，要自己出去俾錢嗌嘢食，指示並唔起眼。鰻魚飯好快黎到，鰻魚大大件，幾厚身，油脂分佈均勻，入口即融，口感彈牙，可惜魚尾燒到黑晒，而且近尾位較多尖到好似針仔嘅魚骨；白飯上面鋪左適量嘅日本飯素；沙律不過不失。雞肉鳥冬鍋等左半個鐘至到，仲要極普通完全冇技巧可言，同自己喺屋企煮嘅水平相若，嚴重扣分!!!湯底係典型港式偽日本湯，得個咸字，味道膚淺；烏冬表面上係高檔扁身手打烏冬，但一咬落去立即現形，淋過超市噹噹烏冬；配菜煮到淋晒冇晒本身味道；雞肉白烚；翠玉瓜苦到要吐返出黎!!!跟餐熱柚子蜜勁細杯，放左少少柚子蜜糖入杯後就咁加左熱水就拎俾個客，攪都懶得攪，又唔提供攪攪棒，杯嘢根本飲唔到味原本高高興興支持下小店，食完終於明點解咁少客。收呢個價錢仲要等咁耐又唔好食......唔會再去了