有間茶記响附近

Open Now

Now Closed

夜晚去咗土瓜灣約friend，話「有間茶記响附近」，唔講唔知原來係餐廳名，好搞笑🤣 新開業無耐，環境光猛，座位闊落，坐得幾舒服，價錢親民化，而且食物款式眾多，經過值得一試👍雖然過咗下午茶時間，但係都可以叫西多，口痕要咗個榛子醬果仁西多士，賣相一流，好大一個，外皮炸至金黃酥脆，內裏軟綿，以Nutella做餡料相比朱古力醬食落反而無咁膩，正😍咖喱三寶鍋熱辣辣上枱，咖喱帶點微辣，撈飯一流，入面有牛脷、豬軟骨、牛腩、薯仔同洋蔥，煮至入味，唔算嚡口，吸飽醬汁，值得一讚係薯仔，大大塊，好腍，薯味突出，性價比高🥔見隔離枱叫嘅菜式好吸引所以又忍唔住跟風，鮮茄炒滑蛋十分濕潤，酸甜可口，入口滑溜，老少咸宜、金銀蛋浸時菜份量唔少，蔬菜新鮮，加入皮蛋及鹹蛋，鹹香味俱全，湯底清甜，當湯飲😂