越蘆越南牛肉粉 (Closed)

行過依間越南餐廳見到佢嘅下午茶餐幾抵食，環境又唔錯，就決定入去試吓。蕃茄蟹檬 ($68)有好多料同好大碗，料有蟹肉，豬肉，丸仔同扎肉，仲有原個蕃茄，湯底幾有茄味，再唧啲青檸落去，酸酸甜甜，檬粉份量真係好多，我諗佢下午茶份量應該同午餐晚餐係一樣，所以真係好抵食，雖然蟹肉冇乜蟹味，但係依個價錢絕對收貨。咖喱牛腩配法包 ($65)超級推介！咖喱汁充滿椰香，法包用牛油焗到香脆，麵包入面唔乾好軟熟，點咖喱汁嚟食超級好食，牛腩有好多舊，又蚊到好林。另外加小食叫咗烤豬頸肉 (+$38)同蟹肉春卷 (+$28)。豬頸肉充滿油脂香味，又唔韌，厚薄適中大大塊，烤得好香，仲有甜酸醬點嚟食。蟹肉春卷新鮮炸起熱辣辣，脆卜卜，雖然餡料入面蟹肉唔多，都不失為一條好好食嘅越南春卷。最近天氣熱咗好多，所以叫咗椰青 (+$28)同牛油果沙冰 (+$22)。椰青大大個清甜多汁，唔使自己係屋企開夠晒方便。牛油果沙冰飲落好清新，唔會好甜，好有牛油果味。