留民料理

Open Now

Now Closed

放假前夕，同阿媽食日本菜。行置樂行咗咁耐，先發覺轉角位有呢間隱世居酒居，相逢恨晚。蟹籽溫泉蛋作為前菜，清一清味蕾先。有白生啤，當然要點咸咸地嘅送酒菜。點咗生曬尤魚乾，條條都有厚度，有口感。脆皮炸BB乳鴿採用生炸手法，皮脆肉嫩，撕開有肉汁。肉味香濃，外層甜甜地。惹味到阿媽忍唔住問下點煮，當然呢個係商業秘密㊙️小食牛油果芝士多士最有驚喜，有配搭common，但味道係世界級。牛油果加加埋埋有一個，件件都熟成好甜。牛油果上蓋滿灸燒過嘅芝士，輕易做到拉絲。多士亦好細心咁用牛油烘過先。串燒拼盤有5串，日日唔同，大致有豬、牛、雞、蔬菜。由於阿媽唔食牛，所以事先同店員溝通，食其他代替。個人最鍾意豬肉，夠甘香。阿媽對雞肉腸同雞肉讚口不停，雞肉爽口。串燒旁配咗粉紅岩鹽同七味粉，呢點都細心。主食係燒鰻魚燴飯，中西fusion效果唔錯。飯底用三色椒、茄子先爆香，再用鰻魚汁燴，味道香濃。最重要係有兩條肥美鰻魚串，好豐富。整體食物有驚喜，性價比高，最重要係睇得出店主好用心，大推。