星洲名廚 (Closed)

半工讀既生涯真係好辛苦，放工之後咁攰，夜晚都仲要去上堂，上堂之前唔食返啲美食補充一下體力，真係對唔住自己！我哋見距離上堂仲有少少時間，於是我同同學就揀咗呢間食，同埋我哋去嘅時候有位坐，於是就入咗去坐低。我見到餐牌有椰漿飯，因為我未試過，所以就點左呢個餐試吓，餸方面我揀左秘製豬頸肉。而我朋友就揀咗香茅雞扒煎蛋飯。個餐仲附送老火例湯同埋餐飲，都幾抵食！啲返個份量都幾大碟，我哋都食唔晒，個豬頸肉同埋雞扒都好好食，味道好夠，我哋都食到好飽好滿足！