御前大江戶日式料理 (Closed)

一連幾個大節日，有晚就同人去咗觀塘嘅御前大江戶食放題，電梯大堂佈置成日本江戶時代嘅街道咁好得意。因為啱啱等入場嗰陣太多人，趁食客入晒場就影下先。入面嘅裝修同電梯大堂首尾呼應，仲掛咗紙燈籠粉飾一番。每檯都有氣體爐，可以一邊磯燒海鮮，一邊食刺身等等日式料理。呢度唔係傳統剔紙仔，而係用平板電腦叫嘢食，好處係唔會出現舉手冇人理嘅情況，仲可以翻查紀錄，睇下自己叫過乜嘢食。先嚟嘅係按人頭配額嘅海鮮，蠔同帆立貝雖然外殼開得唔太好有少少巖巖巉巉，不過都幾大隻。大蜆同海蝦等等就係任點任食嘅。檯上仲有張說明書，列出唔同食材嘅磯燒方法同時間。每隻大蜆都好肥大。我哋仲食咗啲壽司同其他嘢，海膽黃金蝦、焦糖芝士三文魚腩、黑松露北海道帶子、芝士皇帝蟹棒，我就比較鍾意黑松露北海道帶子，黑松露味好濃郁。海膽手卷同軟殼蟹手卷都係一口嘅大小，每個手卷入面嘅海膽份量都唔少，冇腥味冇臭味。鐵板蒜片牛柳粒軟腍有肉汁，鹽燒雞翼燒得較為乾身，鹽燒雞軟骨香口惹味，大江戶燒羊鞍我就冇食講唔到乜味。雖然佢哋係電子落單，不過都有少少漏單情況，有啲嘢食到我哋就走都冇嚟，例如係蟹肉海膽湯飯等等，好彩大路少少嘅嘢食就嚟得算足。