上海老家 (Closed)

今日放工又同男朋友去大角咀搵野食，平時食得多cafe同西餐，有時都想食下啲中菜，今晚晚飯我地就決定食上海野。〈酸辣湯（細）〉男朋友本身唔鐘意食太辣都覺得呢個湯酸辣度適中，幾易入口，酸酸地非常開胃。細size既酸辣湯其實份量一啲都唔少，兩個人share就啱啱好。〈三鮮炒年糕〉炒年糕煙煙韌韌啱晒我，菜都幾新鮮，醬汁味道調得啱啱好，惹味得黎唔會過鹹，而且都炒得幾有獲氣，呢個小菜值得一試。〈脆皮素鵝〉金黃色既外表望落都幾吸引，外面炸得微微脆，咬落去腐皮煙韌有咬口。入面餡料有冬菇絲同甘筍絲等等，都幾足料，點埋喼汁一齊食就perfect。〈小籠包〉黎到上海餐廳又點可以唔叫小籠包！呢到既小籠包皮夠薄身同滑，口感煙韌，唔係好粉果隻。小籠包入面灌滿湯汁，唔會怕一夾起就漏晒出黎，肉餡咬落去肉質彈牙，幾有水準。見到佢地menu到既甜品都幾吸引，本身仲想試埋甜品，但可惜兩個人食唔到太多野，唯有下次再黎試！