瀛豐放題料理專門店 (Moved) New Location

放題成日都食，大閘蟹放題就一定係期間限定，唔係成日有。今日同朋友嚟食放題，梗係主打大閘蟹！寫住大約三両半至四両，但比想象中更大，幾重手。 望落乾淨，鮮香味十足，多膏，蟹肉又甜，任點任食，抵贊！要快手拆快口食~~食完蟹記住要飲薑茶喎。海膽火焰帶子賣相一流，帶子好大隻，將鮮甜嫩滑嘅海膽包住一齊食，食起嚟口感有帶子嘅韌性同嫩滑。 不過就見唔到有火焰呀！即開生蠔非常新鮮，蠔身肥大又厚身，好肥美。 加上少少檸檬汁，更加能將蠔嘅鮮甜味帶出。刺身盤非常非常非常豐盛，並唔係一般隨意拼湊而成，有三文魚、八爪魚、珍寶赤蝦、鮑片、象拔蚌、馬刀貝‥‥‥每種刺身都份量十足，幾鮮甜。泰式燒元貝係好大隻，配埋特調醬料，夠晒惹味！燒菠蘿鮮黃色，未食都知成熟香甜，開胃之選。香茜三文魚湯同冬陰公蝦湯都係熱辣辣，食咗好多凍刺身，飲碗熱湯真係正！飛天炒通菜爽口惹味，推介！最後食埋雪糕雪條同甜品，好豐富嘅一餐。