火五越式牛肉粉專門店 (清風街) (Closed)

好耐冇去過維園，趁假期專登過去跑下步，做完運動，決定去附近行下，順便買點日用品。有人提議先嚟清風街呢間「火五」食晏，再繼續行程。餐牌選擇好豐富，除咗主打嘅越式河粉，另外仲有檬粉、米紙卷、小食、青木瓜沙律、一系列越式油香飯及冷熱飲品等供應。先嚟兩款小食，黃金蝦球 ($48) 同 越式炸蝦春卷 ($28)，蝦球一客有 5 顆，好大粒，炸至金黃酥脆，面層沾滿濃郁嘅鹹蛋黃醬汁，入口鮮香惹味又彈牙。春卷同樣炸得非常香口，入面塞滿爽彈的蝦膠，用生菜包住食，清新又不油膩。主食點咗越式魚翅花膠雞湯河 ($59) 同 火五炭燒鰻魚飯 ($48)。湯底相當清甜，既順喉又無味精。魚翅甚有咬口，花膠富彈性，雞肉嫩滑不嚡，河粉有米香，軟滑好食。另外碗炭燒鰻魚飯，水準亦唔錯，塊鰻魚好厚身，大大件，烤至外脆內軟，魚肉嫩滑有光澤，入口軟腍又有肉感，醬汁香濃惹味，以米飯伴吃，大滿足！凡點選任何河粉、油香飯，+$8 可配港式飲品，點咗杯港式奶茶 (+$8)，熱辣辣，茶味十足，冇苦澀味，飲完成身暖笠笠。