越滿 (Closed)

天時暑熱30幾度，係旺角行街行到熱辣辣，真係無咩胃口。見到有間幾新淨的越南餐廳，就試下入去食下消暑餐，食完覺得都幾抵食同有質素!同個friend得2個人，叫左啲小食、炒飯同生牛肉河。小食叫左軟殼蟹米紙卷，每件都好足料，個米紙皮軟身煙靭，軟殼蟹就炸到脆卜卜，加上爽脆青瓜絲，沾埋個越式酸甜魚露汁，口感好豐富，真係幾開胃~炒飯係菠蘿豬頸肉炒飯，一人份量剛剛好，甜甜的菠蘿勁解暑！炒飯有提子乾同少少咖哩調味。豬頸肉燒得幾好，唔會硬邦邦或者過於乾掙掙，瘦肉比較多，適合唔食肥肉的人❤$52幾抵食。生牛肉湯河的配菜(芽菜，青檸，九層塔)都係分上，想要咩味可以自己調較，食得出芽菜勁新鮮，超爽脆~生牛肉味道濃郁，份量都幾多。河粉分量都多，個有少少黏埋一團，等一陣都係可以分開麵條的。消暑梗係要黎返杯青檸核打，梳打罐裝上好夠氣，加上清新青檸勁解渴，透心涼😆總括嚟講，食物質素不俗，環境都幾好坐，價錢都好合理。