一豊 (Closed)

平時真係好少會入天水圍，果日甘岩返完大陸係深圳灣坐巴士到天水圍，見肚餓就係度搵食啦！六點零鐘，見啲餐廳都開始多人，因為想食日本野，就揀左呢間啦！一豊似係新開既餐廳，好新淨，裝潢別緻，以竹作主題，入門口位有條石仔路，座位以竹支同葉分隔，俾人舒服既感覺。估唔到係呢度會有黑松露薯條食，哈哈薯條粗薯，熱辣辣，好脆口，有少少紫菜粉係上面。好中意個黑松露醬，好香，好好味，個主角好似係黑松露醬而唔係薯條甘上野壽司鰻魚好長！燒到焦焦地，皮位有少咬口，夾埋鰻魚汁食，正！海膽份量算多，幾鮮甜。蔥花吞拿魚蓉手卷，新鮮，啖啖肉，有少少蔥既香味！其他壽司仲有甜蝦、、帆立貝、炙燒三文魚同油甘魚等，味道鮮甜。生薑黑豚肉丼珍珠米，黑豚肉同雜菌炒香，有少少汁係飯度，材料滲入左生薑既味道，撈混晒食唔錯，好開胃，又唔會太濟。豬軟骨湯烏冬豬骨湯唔算太濃，但豬軟骨入晒味，好林！烏冬好彈牙，正！食物整體上唔錯，座位亦坐得舒服，價錢唔貴，可以再去！