Talk 2 DeCream (Closed)

食完晚飯意猶未盡，行過厚福街見到呢間雪糕店人氣幾旺，味道選擇亦幾特別，同先生一齊湊下熱鬧。成間鋪頭以少女粉紅做主題，加上霓虹燈管整成嘅招牌，非常矚目，打卡亦一流。雪糕選擇唔算多，但勝在款款都有自己嘅特色，淨係揀要咩味都需要啲時間。最後我揀咗店員推薦嘅玉桂蘋果樹，標榜純人手自家製作，加入每日新鮮製作嘅天然蘋果蓉醬，同外面嘅化學雪糕自然有分別。雪糕帶有濃濃嘅牛奶味，質感香滑，面頭灑上肉桂粉同插上一片蘋果乾，軟雪糕底下係蘋果蓉醬，再底層係忌廉同餅碎，好有層次感。蘋果蓉醬酸酸甜甜，配搭上玉桂粉，感覺好似食緊apple crumble一樣，但佢食落質感同味道更豐富。先生當然係揀佢最愛嘅朱古力，三重奏朱古力杯除咗有朱古力軟雪糕，面頭插住一塊Oreo，仲有加入玄米碎嘅朱古力醬同朱古力餅底，朱古力迷絕對唔能夠放過。朱古力雪糕本身嘅味道已經好濃郁，加上75%嘅朱古力醬令味道更香更濃，仲混入玄米粒，入口卜卜脆，溝埋餅底一齊食口感更豐富。呢度嘅雪糕組合好有新鮮感，加上成份天然同人手自家製，令人更加難以抗拒，難怪咁夜依然人氣旺盛。