大勝軒丸一 (金星閣) (Closed)

屋企樓下開咗間新嘅餐廳，出名食日式沾麵！標榜湯底係由日本直送！成日經過都見到超多人排隊，今日專登同老公落去試吓！餐廳開11點半，我哋早15分鐘落去排隊！開門前十分鐘左右職員會出嚟派點菜紙，之後會直接幫我地落單! 所以一坐低之後好快就有得食！餐廳環境一般，鋪面好細，得20個位左右！呢排天氣好熱，成30幾度！感覺餐廳入面冷氣唔夠，老公未食已經出晒汗！仲有幾隻蚊滋飛黎飛去，都幾騷擾吓！我地點左一碗大勝軒沾麵、一碗特盛沾麵加一碟餃子！兩款沾麵嘅湯底其實一樣，只係特盛多一塊叉燒同埋一隻味玉（蛋）！麵可以揀「凍」或者「微暖」！我揀咗微暖、老公就揀凍！麵可以揀200g或者250g! 兩者價錢一樣！麵質幾彈牙，口感不錯！湯底幾濃味，唔算太油，不過我嫌唔夠熱！叉燒算鬆化，不過好細舊！偷食左老公嘅味玉，雖然唔係流心，但味道不俗！餃子正常的好味！整體食物質素OK！但係環境認真麻麻！埋單＄200！如果唔使排隊，都可以一試嘅！