木船泰國粉麵專門店 (Closed)

Encore左幾次，呢間餐廳打破泰國菜比較貴既想法。最抵食係外賣套餐，份量仲比堂食大。晚市Menu有普通dinner set，定食，家庭套餐。小心留意窗上既宣傳，近期仲偷偷推出左抗疫餐，平過自己煮! 落左單先見到蝕左啦屋企人最鐘意食燒豚肉温泉蛋飯，日式配搭加埋泰國木瓜絲。青木瓜絲爽脆清新，拌入少少微酸既醬汁非常開胃。單單係呢一個木瓜沙律已經可以獨立做一道菜賣比食客。燒豬肉片邊緣焦香脆脆地，因為有醬汁加持依然濕潤。偏甜既燒肉醬加少少辣味食到停唔到。定食仲跟埋三款前菜，以及冬陰功或肉丸湯，亦包含熱飲。前菜又係比堂食更大份，返屋企烘一片多士搽蛋醬 正。定食88蚊有6樣食品飲品超值，女仔黎講仲足夠分兩餐添。平既選擇揀左焗青咖哩豬排飯，配熱飲五十幾蚊。豬排上下堆疊有兩層，加上幾條荷蘭豆同拉絲芝士。青咖喱汁屬比較濃稠的一種，有椰香味很下飯。另外，辣椒膏雞粒炒飯飯量連我男人都話滿足。白米粒粒分明，意料之外炒飯有鑊氣。雞粒之外仲有豆角粒同蛋絲，當然少不了洋蔥香氣。外觀上雖然紅噹噹，但香而不辣，瞬間就比佢鯨吞入肚。值得一提，佢地既外賣盒好硬淨夠深夠大，為環保出一分力最好洗乾淨重用呀。