青花亭 (Closed)

同兩個朋友喺太子附近，搵咗間近近地嘅食下野， book咗位，入到去嘅時候剩返留咗俾我哋嗰張枱，其他都坐滿人。見到其他人都好休閒咁慢慢坐慢慢食，我哋個位置係喺樓上，坐樓上唔係成日有侍應喺附近，呢個係唔係太方便嘅地方。但係其他嘢環境嗰啲都唔錯。打開餐牌，啲名都幾特別，有鹹濕亞伯，又有水清沙幼使乜坐飛機。不過我哋冇嗌到嗰啲，睇落去藍色嗰啲汁，好似好色素咁。我哋穩穩陣陣叫咗啲普通嘢食。叫咗三杯梳打嘅飲品，個杯好靚，嘢飲嘅顏色又黃又粉紅，影到出嚟都好靚。我哋三個人帶咗四樣嘢食，有薯條，有個意大利飯，一個意大利麵。食完真係好飽好滯，我哋三個人完全食唔晒。不過都幾好食，我鍾意食個意大利飯，幾正！食完野慢慢坐喺度傾吓計都係唔錯，同埋啲嘢食都算幾平，我哋份量嗌多咗，但係都係$500鬆啲買單，每人都係百幾蚊。有一點要提嘅係呢度啲嘢食每碟都好似幾靚，唔知點解放埋一齊影就唔係太靚不過值得一讚嘅係呢度啲燈光影到個人好靚，呢個都好重要。有好多食嘢嘅地方影到個人好黃，或者啲五官好奇怪，呢度冇呢個問題。