金子半之助 (東薈城名店倉)

Open Now

Now Closed

話咁快又完了四日三夜之旅，抵港又快又平嘅回家方法就係巴士去東涌再轉港鐵。去到東涌都7點多，廉航又無飛機餐，餓到爆….決定醫醫肚先回家。好少去東涌，一上扶手電梯就見到間金光耀眼的天丼店好吸引，一於試試。裏面以木系為主，日式裝潢簡約，感覺舒適，座位仲幾多添！選擇有多款天丼、烏冬配迷你天井、單品、飲品和兒童餐。餓了5個多鐘，要食得豐富啲！揀咗迷你天井配稻庭烏冬（$118），有齊兩個組合，正！溫烏冬還配有一個寶盒，內有溫泉蛋、海藻、蔥花、鰹魚花和天婦羅碎，放進滑身的烏冬內，變得更豐富美味！迷你天井都好豐富，粒粒飽滿嘅米飯上放咗多款天婦羅，有菇菌、海老、南瓜、海苔、莢豌豆和溫泉蛋。全部都不錯，最喜歡菇菌，又爽又脆；南瓜就外脆內粉綿；海苔就脆卜卜。最正係將溫泉蛋刺開，蛋黃液滲入米飯中，加埋秘製醬汁，好味得很！見到OpenRice 啲食友推介穴子天婦羅（$68），又試下先！嘩！好長呀！差不多有我上臂咁長，仲好厚肉，勁！食落外脆內肥美軟滑，再點啲醬汁更好味！還有白身魚（$28），同樣外脆內嫩，啖啖肉，完全無骨，仲好鮮美，喜歡！味噌湯 （$8）暖笠笠，有豆腐粒、蔥花和昆布，味道剛好，不會太鹹。