讚好台灣

Open Now

Now Closed

朋友是出了名的為食兔，成日都會介紹我食好嘢，不過地膽都有失手嘅時候。朋友以前一向都食開呢間讚好台灣，不過近幾個月少去嗰邊都有一排冇食過。上星期我同佢咁啱去開附近，佢就提議不如食呢間。入到去啱啱有位，又係下午茶時間，於是我就嗌咗個tea set，朋友有事要行開吓話返嚟先嗌，我惟有喺冇推薦之下自己揀。我揀咗最正路嘅麻醬乾麵，配台式香腸、甘梅脆薯同鹽酥雞，飲品就揀咗檸檬綠茶。麻醬乾麵勁鹹，麵亦偏腍，至於個甘梅脆薯則又凍又韌，皆因個外皮太厚。鹽酥雞係好食嘅，唔會太乾，香腸則正常。而個檸檬綠茶則勁澀，作為一間專賣台式食品嘅店舖，基本上係完全唔合格。朋友後嗌order咗擔擔麵配小香腸、木魚炸豆腐同椒麻牛肚絲。佢個麵同我一樣都好腍，不過佢冇硬食，而係直接同侍應講同平時比差好遠，想換過，結果佢轉咗滷肉飯。個木魚炸豆腐好食，炸漿夠薄僅僅包住滑豆腐，而牛肚絲則夠腍，但味道一般。整體而言我係偏失望嘅，可能之前期望太高，朋友則話喺疫情嗰段時間其實佢哋水準係keep得好好嘅，不過疫情後反而差咗。