桂林米粉

Open Now

Now Closed

見到呢間叫「桂林米粉」嘅舖，突然諗起細個嗰時媽咪帶我去過桂林食正宗米粉，簡單一碗米粉配炸菜，已經好好食，係米粉本身質地問題，好易入味！今晚決定尋找呢種味道，就入咗去，入去前我仲問老闆娘「係咪正宗桂林米粉？」佢就話放心「係！」我同我老公分別叫咗牛腩米粉及水餃米粉，牛腩嗰碗加咗豆卜，碗粉嚟到有陣酸味，原來係酸菜味，點解要加酸菜呢？唔明，又唔係食四川嘢！牛腩切得好細粒，完全唔似牛腩嗰種口感，不如叫呢啲做牛腩粒好啲。咬啲牛腩有酸味嘅？好怪呀！我以為變酸，好明顯係啲酸菜蓋過牛腩嘅本身味道！至於水餃呢？味道似灣仔碼頭水餃咁嘅？！唔好食！最嬲係個米粉呀！似米線多過米粉囉！嬲呀！咁都要呃嘅！呢間舖係有轉米線、河粉、麵！但我係叫米粉囉！最後俾錢時，我問老闆「真係桂林米粉？」佢話係！食完呢一次，我係唔會再食。如果要食酸辣米線，我不如去乜哥米線食，好食好多！味道起碼唔會奇奇怪怪先啦