海記合桃坊甜品 (Closed)

夜媽媽本來想食個甜品就滿足返屋企，朋友就介紹我去尖沙咀呢間甜品舖試下，見門口都有人排隊，都諗住OK啦，點知埋去問阿姐攞位，阿姐十問九唔應，淨係掛住收錢，門口果啲又唔知係等外賣定堂食，諗住排隊混亂都算，叫杏仁糊，阿姐拎到嚟係咁叫「杏汁」邊位，聽咗幾次先知佢噏乜，唔知幾時杏仁糊個名叫咗做「杏汁」，而個杏仁糊明顯好杰又超甜，一啲都無「汁」嘅質感。之後重點嚟喇，簡單叫一碗腐竹白果薏米糖水，竟然成碗大半白果都係爛嘅，朋友一食落口，又酸又臭，極度失望，以後都唔幫襯。朋友話上次去食合桃露係好食，無諗過今次咁差，可能「海記合桃坊甜品」只可以食合桃露，其他都唔駛諗。