鐵板神燒 (Closed)

平日經過見門面幾靚咁都有興趣去試下，有日下午經過就同朋友去試咗。入面格局似日本啲餐廳㩒機揀嘢食然後入錢出飛揾位坐，下午set全部都係啲平價定食咁，以為會有扒類但係冇，我同朋友一人揀咗一個餐share，芝士泡菜豚肉同肥牛燒。佢嘢飲係自助，任飲，有暖水，暖甜紅茶（唔明點解要落糖），仲有味噌湯，湯我冇飲，水因爲係暖我都冇飲，好在有帶水。唔好彩地我同朋友坐咗喺正佢爐前，佢炒嘢果陣其實都幾大油煙，跟住佢裝咗兩碗飯比我地，竟然唔係珍珠米，係啲絲苗米咁，仲要個飯唔好食，我冇食晒個飯，泡菜豚肉有芝士面，多肥，味道唔叫好食，正常，肥牛極薄，所以佢一炒就碎晒，碎濕濕咁，都係偏油味道正常唔叫好食，公道啲講，價錢唔算貴，豚肉餐$60肥牛$70，但呢個價錢如果去食日本定食餐一定好食過佢，同埋接受唔到食日本嘢竟然唔係食珍珠米，唔知晚市會唔會好啲，但我應該唔會再去食。