池記永續排神州客長龍，潮發永續塞滿神州民，最後走到奀仔雲吞檔，大把位唔洗等隨便坐！空氣清新寬敞，乾淨光猛寧靜，客路企理斯文。長途跋涉花足個幾鐘，終於可以坐低嘆杯熱茶。崩杯就不要給食客用吧，危險及不美觀且影響形象。貫徹始終只供應浙醋、豉油、辣椒醬，由細到大都無辣椒油呢！唯一改變的係除雲吞麵外，添加牛腩、豬雜、粥品、等等比大眾食家享用啊！
叔叔唔比餐牌我既？諗住我記得所有菜色那麼利害？原來餐牌藏於檯側暗架。被安排到貼牆迷你座位，我這麼標準的健美身形都要有半個身離開張檯，會否太迫太細呢？放碟撈麵、清湯、油菜、熱茶、豉油碟已霸佔四份三張檯，我一個人坐都覺得辛苦呀﹗
原來只有銀絲麵及河粉供應，其他一應沒有。飲品都只得豆漿或汽水，不需要複雜一切從簡。沒幾個食客，食得安寧嘆世界，只要不是坐貼牆位就十分舒適。其實我可以食兩個撈麵，都係費事食太飽啦！吉日探下奀仔，碗麵堅奀得一啖，加個咸肉糭剛好，食飽先有力行去恤個靚髮，重新恤髮。
凍豆漿，淡淡豆香不甜不黏非常適合我口味，實在太細杯一啖清晒！非常厚身，彷似有豆渣似的，雖然幼滑不足，但豆香強勁！我只不過想食碗粥之麻，您地唔洗緊張到不停出錯喎。我要一品粥就黎碗雞粥、我要豆漿就留單、隔離大嬸要張單就比杯熱茶、我埋單找 $1 蚊就比找 $10 蚊我。如果食雞粥都好陰功，係我檢查那碗錯的雞粥時發現，雖有五六舊細細雞件，但全部骨杉杉斬碎雞，只有雞中翼及雞背脊，就連雞翼都一開四，真好刀功！
一品粥，跟牆上張海報根本天堂與地獄，雖然相片只供參考，都不能離天百丈遠，都不能認都認唔出架麻！全部食材細細件沉晒底，大海撈針一樣。瑤柱絲有點雪藏味，滑牛超勁鬆肉粉，𢲡到腍劈劈滑潺潺醃味混濁。豬膶外脆內軟多汁不乾硬，豬腰鮮甜爽爽脆脆。雞件只得一小舊，這件正是剛才雞粥內的雞中翼一開四那件，麻油味強烈，砂糖味也不弱。冬菇粒彈彈極濃香菇味，粥底驚喜醇香甜美充滿雞湯味道，清爽薄薄的質地更是開胃。
世家雲吞柱侯牛腩撈麵，雲吞分開上正常不過。突然想起大埔城仔記雲呑水餃跟幼麵撈埋一齊，並無擺盤或賣相慨念！還要將蠔油直接淋上面，完全無打算迫開食材，整碟馬馬虎虎亂七八嘈掉係食客面前，師傅心聲食啦﹗半口就珍迷你雲吞轉眼有五十年歷史咯！讓極濃大地魚鮮蝦子味清湯浸著，當然要連湯一齊送到嘴仔裡去，滑而薄的雲吞皮包蝦肉鮮爽噴汁，簡約的美味調配活了半個世紀！
罕有地將牛腩切成方形，好彈的一口腩粒！不乏肉汁，芳香醇厚的柱侯味道，隱若食到有陣陣五香，是我的錯覺嗎？美麗的自家獨特銀絲麵！百份百由鴨蛋製造，纖細幼幼，絲絲的獨特口感非常舒服！撈上咸辣醬捲埋牛腩齊齊嘆，頂峰高級享受！雖然價錢偏高一點點 $80 大元，質素有保證，只要您喜歡，必定物有所值！
蠔油芥蘭，一分錢一分貨！特上芥蘭色澤鮮明翠綠吸引，每條莖爽脆爆汁，菜甜味無限伸延，每塊葉嫩嫩回甘，滾上鮮味蠔油食得乾乾淨淨！蝦球蝦子撈麵，每道菜都用心經營，設置美觀大方，擺盤骨子靚靚，最慘價高質高份量少，依個價錢夠我食 3 個普通雲吞撈咯！蝦球真的夠巨形，不是鮮蝦，只屬雪藏類別。鹽醃啤水明蝦球，過水夠乾淨，沒有討厭的鹽味，爽爽的口感一流，味道平凡一般，讓蝦子撈麵捲著享用會更可口味美！熟蔥靚蔥現在都食得到，生蔥腥草始終受不了！特別是湯麵及蒸魚。銀絲麵撈埋辣椒醬蝦子夾起蔥絲啜啜啜，芬芳甘香咸辣，銀絲麵極幼極爽無得頂！
特效牛筋河，餐牌寫住特效牛筋，有什麼特效呢？立即養顏定壯陽呀？爽爽的質地，不是黏滑綿類，果皮味突出，清新柱侯舔舔脷！我最愛的極幼河粉，除極爽幼銀絲麵外，連河粉都極幼有誠意！綿綿滑滑勁索湯，微燙湯汁成碗拿起直接倒入口，超級暢快辣醬也不需，原味才是皇道！罪過罪過飲到一滴湯都無剩。
淨南乳豬手，清理得非常乾淨，無手毛無腳毛無腳皮，而且仲有修甲添喎！熱辣辣燙燙品嚐，特濃南乳味，濃而不濁，皮滑膠黏，肉多骨少，充滿骨膠原，食完抹嘴連紙巾都黏著我的雙脣呢。水餃麵，的骰一口水餃，包得結實不鬆散，餡料若隱若現更是誘惑。滑嘟嘟完整餃皮，蝦爽鮮味，木耳爽脆，豬肉彈彈甜美，濕潤大愛。
京都炸醬撈麵，粗粗嚥韌肉絲十分有嚼勁，半甜半辣微油微黏的炸醬，神秘的調配混著爽爽銀絲麵使人回味再回味！ 蠔皇花菇，無需加蔥架麻？蔥加菇更好食？不懂欣賞。花菇 4 粒拼生菜半個，微溫生菜，室溫花菇，怕燙傷我嘴仔嗎？蠔油在那？蠔油味又在那？整碟味道都異常清淡。厚滑花菇不夠濃，爽脆生菜不夠甜，食完才醒起可以問侍應比蠔油喎，但一切已經太遲，被我全部幹掉了！
皮蛋瘦肉粥，不是生滾粥，亦沒有跟食材齊齊滾過。先將皮蛋瘦肉放碗底，倒個滾粥係面直接出貨，浸泡出來的那會色香味俱全！各自為政，肉還肉、蛋還蛋、粥還粥，唯有親手耐心地撈均，再等幾分鐘，讓她們溝通一下，才施施然將所有食材連粥一拼入口！皮蛋優質，蛋黃綿黏黏夠甘香，蛋皮嫩嫩滑滑，搭上咸肉連清爽粥水享用，醇香美味也不錯，不需再加添豉油或胡椒粉咯。
蝦子撈麵，自家銀絲極幼麵別俱一格，比其他麵店優勝，不能相提並論。師傅無手軟，將蝦子鋪滿麵條上，麵條爽爽掛著大量蝦子，甘香無比，加少少大地魚清湯使到蝦子味道更上一層樓！皮蛋瘦肉粥蝦子撈麵，最愛靚麵配滾粥！拖著燙燙粥水濕潤地啜，兩者合體得天衣無縫，拍爛手掌滿分！
淨牛腩，牡丹雖好都要綠葉扶持！淨食寡寡地，配麵配飯會更滋味，味道會更上一層樓。鮮牛肉麵，完全係粥舖的全方位勁鬆牛肉，腍劈劈滑潺潺，醃味重手，難得還有一絲牛肉味。少食多滋味！我唔係講笑，銀絲麵堅係可以一啖啜晒無得剩！起碼食兩碗先夠飽。
蛋黃咸肉糉，溫柔地界十字察看什麼料子！肥膏、肉絲、綠豆、咸蛋黃，咸肉份量真的太少，而且脂肪甘香不足。綠豆佔一半以上，味道全部搶去，黏黏濕潤糯米飯滾點甜豉油還算可以。
豬膶麵，我見張相有蔥，所以才叫走蔥，誰知來的是韮黃！真的每次都要講齊走蔥走韮黃才最安全，唯有自己襯自挑走吧！灼豬內臟味跟指天椒豉油味道夾到絕！添上鮮氣，厚切肥美豬膶爽滑幼嫩，甘甜爆味舔舔嘴。沒有辣椒油的奀記，辣醬都試過好幾次，搞搞新意思淋點辣椒豉油吧！味道怪怪的，算吧。
