智景車仔麵 (Closed)

炎炎夏日，坐低就叫咗杯紅豆冰飲。由於呢間餐廳嘅紅豆冰用咗鐵杯裝，以致見唔到紅豆冰紅白分明嘅經典招牌賣相，少咗一個打片位，亦見唔到紅豆同奶嘅比例。但就係因為呢種薄鐵杯冇隔温效果，杯紅豆冰一上台就會有好多倒汗水，隻手同隻鐵杯接觸嗰刻，可以完全毫無保留地Feel到杯紅豆冰有幾冰凍，飲落特別消暑，感覺有別於飲一般用膠杯裝嘅紅豆冰。裝紅豆冰嘅銀色杯身鐵杯配上同樣係銀色嘅鐵羹組 合，喺隨意中畀人一種不隨便嘅感覺，而且好環保噉唔係用即棄膠羹or攪棍。杯紅豆冰冰嘅比例非常適中，飲到底都仲見到少少冰，由落台到埋單嗰刻，杯紅豆冰依然係好凍嘅。由於杯紅豆冰本身就好濃郁，唔使驚啲冰溶咗，令杯紅豆冰太淡嘅情況出現。杯紅豆冰好重奶味，紅豆亦煮得夠溶，整體嚟講係偏甜嘅，關注血糖人士要注意，不過好味。唯獨飲太多會有啲漏，不過好彩佢分量啱啱好。呢間餐廳走塑成功率好高㗎！我今次走飲管又成功咗，仲歡迎自攜食物盒買嘢食。不過佢會照收加一蚊外賣費。