鯛魚魚湯專門店 (Closed)

自己經常都會煲湯，唯獨是對魚湯就投晒降，一來煲唔到奶白色，二來煲完會腥，亦怕煲湯時有好多骨，所以對坊間的魚湯米線情有獨鍾。居於太古城友人告之鰂魚涌有鯛魚湯專門店，果頭星期六日唔係好多舖頭有開，既然咁講，就趁周末搵友人聚舊兼食飯。友人告之食晚餐要趁早，因為夜咗人多兼且部份限量菜式會售罄，我同友人六點半到達坐到最後一張枱，遲嚟真係要等位。友人係熟客，由佢發板。佢幫我叫咗鮑魚花膠魚肚魚湯烏冬，聽落真係好名貴，又鮑魚又花膠又魚肚。鮑魚有兩隻，食落唔講得少，真係有鮑魚味，煙韌彈牙。花膠似係花膠筒，有三至四舊，膠質唔係好重，不過話晒都係花膠，食咗感覺皮膚都會滑啲。魚肚都有三至四舊，似砂爆魚肚，質地軟腍，吸湯能力高。奶白魚湯用鯛魚淆製，感覺上冇落味精，味道比較清甜鮮美，冇咁濃郁。手打烏冬也不錯，質感煙煙韌韌。呢個價錢食到鮑魚花膠魚肚好似好抵，性比價高。友人的皇帝蟹腳海膽湯飯，根據佢形容，蟹腳開半容易起肉，肉質鮮甜，海膽新鮮無腥，入口即溶，混入魚湯中有提鮮作用。另外亦叫了小食餃子雞翼，雞翼已起骨，釀入豬肉，雞翼皮香肉滑。