我杯茶 (永興樓)

Open Now

Now Closed

送咗小朋友上校車之後，我就同班媽咪朋友去食早餐。其中一個媽咪介紹話灣仔嘅「我杯茶」唔錯，於是我哋幾個立即去試。鋪頭唔係好大，只有三張4人枱同一列bar 枱。地方比較窄，未至於背貼背，不過都要大家互相遷就下，如果唔係就會觸碰到其他人。而家天氣咁熱，就算餐廳開大冷氣，我哋可能又食熱嘢啦，大家都食到成身汗😅既然叫得做「我杯茶」咁佢嘅奶茶一定有返咁上下水準啦！於是我叫左杯大嘅熱奶茶同沙嗲牛肉仙草麵嚟試吓。其實餐廳係自己出去點餐，等嗌number，之後再自己拎埋位。不過老板好nice，佢見我哋坐咗埋邊，唔方便起身去攞食物，佢專登攞過嚟俾我哋😊熱奶茶（跟餐，加大$17）茶味香濃，唔會苦澀；沖出嚟嘅顏色好靚；花奶分量適中，唔好黏住喉嚨。真係好飲喎！我會願意專登再去，為咗呢杯茶。沙嗲牛肉仙草麵（$48）大家一見「仙草麵」都好好奇，究竟係咩嚟㗎？係咪凉粉嗰啲「燒仙草」之類呢？一或係「蒟蒻麵」？原來「仙草麵」係用鐡皮石斛榨汁，再用山泉混合而製嘅，綠綠地色，淋淋地，口感似陽春麵，冇乜特別味道。沙嗲牛肉個汁甜甜地，食到粒粒花生碎，就算撈埋喺個湯到都唔會稀晒。牛肉冇筋，唔靭，夠入味。