德美壽司 (新都城中心1期) (Closed)

每星期日午餐都係同屋企人飲茶，今日換換口味去食日本嘢，就去咗家人屋企附近嗰間日本壽司餐廳食，未夠12點已到達，排頭位等入坐。餐廳開鋪後，侍應安排我哋一行6人入坐卡位，感覺座位有點狹窄，睇完menu後，立即落單order食物，食物亦好快送上。極上壽司定食嘅壽司款式不少，新鮮度還可以，但真係冇嗰隻剛從壽司冰櫃攞出嚟，嗰啲冰凍嘅新鮮感覺，實在有點可惜。什錦魚生飯跟之前啲壽司味道差不多，魚生亦係冇嗰啲冰凍新鮮感覺，而係暖暖的，感覺唔太好！鰻魚飯定食嘅鰻魚，肉質質感不錯，但鰻魚汁不夠，而且味道似豉油雞汁多過鰻魚汁。滑蛋豬扒飯表面睇外觀確實不錯，但原來洋蔥和蛋汁都只係上面一遍，食咗一半唔夠已經好似食白飯咁，真係有點強差人意。野菜牛肉鍋係今次呢餐飯最好食嘅，牛肉嫩滑，味道鹹甜剛好到位，不錯！沙律菜配上一片厚切帶子，新鮮可口，日式蒸蛋夠嫩滑，味噌湯味道也算不錯，呢啲全都係定食套餐附送嘅。最後送上定食甜品，原來係芒果奶凍，只可以講句味道還可以啦！不過整體嚟講，呢間餐廳出品真係好一般囉！