天丼てんや

Open Now

Now Closed

新冠疫情底下，相信大家都好掛住日本嘅美食。之前聽朋友講話青衣城開咗一間好好食嘅丼飯。今日就特登搭車過去試吓。我哋兩個人去食，叫咗佢嘅巨星天丼，同埋穴子海老天丼。首先講吓佢嘅巨星天丼，如果你係第一次食嘅朋友，我會極度推薦，因為可以一次過滿足晒你所有願望，食到呢間舖頭出名嘅嘢食，包括：天婦羅蝦、天婦羅紫菜、天婦羅四季豆……總之咩都有。食得出佢啲蝦係新鮮即整嘅天婦羅，第一啖食落去已經充滿驚喜，蝦嘅鮮味齒頰留香。而且配埋佢獨有嘅天婦羅汁，令到蝦嘅鮮味層次更上一層樓。另外講吓佢嘅穴子海老，穴子根據佢餐牌上嘅說明，係一種體積較為細小嘅鰻魚，雖然係咁，可能由於體積細嘅關係所有嘅鮮味都濃縮係佢身體入邊，令到魚嘅味道好濃郁，再加埋佢嘅蝦同樣都係咁出色，包你食過返尋味。今次仲特別試咗佢嘅蘋果汁，佢蘋果汁嘅味道好濃郁好似一啖入邊食咗10個蘋果咁濃郁。而且又唔會太甜雖然蘋果味充足但係只限於味道，而唔係甜嘅味道。所以呢間餐廳值得再試，相信一兩個星期之後，我又忍唔住會搭多一兩個鐘頭車去青衣再試。