尚點 小籠包.上海麵館 (置富第一城) (Closed)

尚點係一間我好鍾意嘅上海菜。最鐘意就係佢哋嘅嫩雞煨麵，因為個湯底真係好好味，睇落白晒晒，不過好有味道，一啲都唔heavy，就算我平時唔太鍾意咁麵湯都覺得好好飲！呢個麵仲有好多菜同雞肉，又唔油，健康之選。間唔時就會好想去食。另外佢哋嘅素鵝都好好食，炸得好酥脆，好食過好多連鎖店。呢度嘅炒年糕都唔錯架，年糕炒得煙靭，係油咗少少，最重要係唔太咸。鍋貼餃子嘅脆面，又薄又脆，餃子入面有好多湯汁，記得小心啲熱湯汁，真係新鮮整架！至於口水雞，唔係我鍾意食，不過都ok， 唔算辣，不過就油囉。另外一樣我好鍾意去尚點食嘅就係佢哋嘅炒飯，雖然今次無叫，不過佢哋嘅炒飯真係好好食，好乾爽，記得試下呀～