千鍋居 (Closed)

同朋友講話約食雞煲，約左好耐都未成事，今晚終於”美夢”實現！話說食雞煲，一大班人最好，嘢食都可以叫多幾款。首先出場當然係雞煲，一行7人當然係叫個大SIZE，由於唔係個個吃得辣，只係叫左少辣。上菜時雞煲面舖上大量芫茜，再放上檯面電磁爐reheat 返，等個煲滾返起就可以按個人喜好混合埋d 芫茜一齊食，食得最夠味當然係混埋芫茜，川椒味加芫茜香味溢出！個汁非常之好味，個汁用左好多香料去煮，非常惹味，雞油加香料煮成的雞汁最啱係撈飯食，白飯都食多兩碗！至於雞肉方面，係一般貨色啦，現在係香港食到的雞肉，想講返句”雞有雞味！” 之類的”廢話” 其實都頗難，大部份冰鮮，乜鬼鮮味都無晒啦。今晚個雞煲可以話係雞汁比雞肉優勝！我地仲叫左田雞煲(要打去預訂)，田雞肉比汁料包裹著，肉質頗嫩，稍嫌田雞肉不夠肥美，此外其實相當好味。其他的”蒸釀豆腐”、”麵醬蒸魚”、” 南乳煮齋” 都係不過不失，勝在售價合理抵食！另外一個推介的是”花蛤蒸蛋” ，非常滑，花蛤的鮮味流入左蛋汁液內，又一伴飯佳品。因為店舖未有酒牌，今晚自攜紅、白酒各一支，配濃味的食物就係一流。總括今晚係又平又抵食，非常滿足的一餐。