唐包點

Open Now

Now Closed

朝早開完會返公司，經過地鐵站見到唐包點，俾佢吸引住，因為價錢真係好平，$25有一個蒸飯，超抵食，一於試下平野有無好野先。「魚香茄子飯」佢好貼心咁將白飯同茄子分開。汁同飯既份量都好足夠。茄子有6大塊，茄子好淋，肉碎都幾多，味道惹味，不太辣，唔食得辣既都絕對可以食到。白飯粒粒分明，唔會太爛，正呀！「章魚肉餅飯」同事叫左呢個飯，我都試左少少，肉餅結實，塊肉餅都幾厚👍🏻好香章魚味，再淋上蒸飯豉油食，味道一流！另外再叫左個燒賣同鮮竹卷share食。其實一開始對呢d係工場做既點心都無抱好大期望，始終覺得佢經過咁長時間由工場運落鋪頭再擺係熱櫃熱住咁耐，質素應該點都唔夠酒樓好，但佢推地既點心質素實在係有少少驚喜。「燒賣」一份有四粒豬肉燒賣。燒賣size雖然唔係大粒，但裡面既肉好結實，味道鮮味，再加上每粒燒賣上面都有一隻蝦，真係真材實料，味道不比酒樓差。「鮮竹卷」一份有3條。腐皮緊緊包著豬肉、木耳絲、蘿蔔絲，咬落去唔會散開，好味道。另外我再試左佢枝黑芝麻豆漿。怕甜人士唔洗擔心，因為唔太甜，有淡淡既芝麻香味，唔錯！總括黎講，唐包點絕對係性價比高既選擇，質素高之餘又唔貴，特別對我呢d窮L黎講，絕對係糧尾救星