北口韓國地道小食 (Closed)

今天是同事的大喜日子，通常要到九點才有得食，所以決定之前食少少打定底。記得之前行過尖沙咀韓國街有間小食店，啱晒，我們一行四人便試試這間小店。去到，小店不大，幾張二人枱，可坐十零人左右，坐低後，當然看看有什麼好食，小食款式不多，所以決定盡試所有小食。飯團﹣﹣桌球大小，飯團由紫菜加蘿蔔，表面灑上黑白芝蔴，味道甜中帶鹹，不太黏，好好味。韓式炒年糕﹣﹣用地道的醬汁，甜甜的帶少少辣，再配合煙韌的韓國年糕，好地道可口的小食。炸三寶﹣﹣可以揀紫菜卷，魷魚鬚，蕃薯及餃子；紫菜卷最好味，炸餃子內裏有韭菜但炸得乾乾的，蕃薯薄薄的一片被脆漿蓋過味道，魷魚就最無味道。串燒雞﹣﹣用甜甜的醬汁燒成的雞肉串，很惹味。魚旦串﹣﹣以為係燒，原來是用湯上，淡淡的味道。迷你熱狗﹣﹣原來係炸漿包住腸仔，外淋上茄汁，腸仔似台灣黑X牌腸仔味道，只係幼些少，外層炸得脆脆，很香口。韓式涼拌粉絲﹣﹣粉絲上舖了椰菜絲，甘筍絲，蟹柳及半隻蛋，再配上甜甜的醬汁，好味。由於之後還有喜宴，所以不能再試其他的麵食，還是留待下次再試。