+5ºC 手抓餅專門店 (Closed)

對於新界西黎講，去筲箕灣耐過番深圳…距離上次去太安樓已經有一段時間，嗰次試左幾間小食，除左來來小食店，冇邊間有深刻印象想番啅。假期剛好去行山，行完山同朋友去到太安樓醫肚，朋友們食左車仔麵，屙到九彩，我神來之筆冇食到 (笑)。呢度有兩間手抓餅，上次我食過另外一間，揀錯配料，味道一般。咸牛肉雞蛋磨菇手抓餅 $37呢間每個餅最低消費30蚊起，餅底16蚊，平時我都好少點三款餸，焗叫。配料選擇豐富，定價 $5-$9，例如生菜5蚊；雞蛋、磨菇6蚊；芝士、肉鬆7蚊；吞拿魚、煙肉8蚊；咸牛肉、燒雞肉9蚊等。同行仲有兩位朋友，一人一份，即叫即做，等左廿幾分鐘，新鮮熱辣。餅皮酥脆，食落又唔覺好油，淨係塊皮已經整得好食過另一間配料都俾得大方，雞蛋普通野啦，但揀配咸牛肉一流！ 磨菇輕輕煎過，冇出水，唔會影響餅底鬆化。而且材料鋪得幾平均，起碼啖啖都食到，免費加沙律醬、辣椒粉，梗係加啦，成件事又好味左！咖啡香草奶茶 朋友點的，非常普通。整體黎講，如果黎到太安樓，都可以一試呢間手抓餅呢！