相撲手日式放題 (Closed)

今日同幾位巴打飯聚一下，為左食得盡興，佢地揀左位於寶勒巷既相撲手日式放題，等大家可以就自己口味任叫任食。2樓全層都係餐廳範圍，裝修以黑色為主，配以木製枱椅，配上微微既燈光，非常有格調。坐位都夠晒闊落，無論情侶約會，朋友飯聚，都非常適合。剛坐低研究緊點菜紙之際，叮叮叮叮叮....原來有即劏藍鯨吞拿魚表演，睇住師父手起刀落，不消十分鐘就將大大條藍鯨吞拿魚切成一片片既刺身。每位客人可以品嘗到兩片肥美鮮甜既吞拿魚刺身。設有飲品櫃同甜品櫃，有各式各樣既飲品同甜品供客人揀選，食幾多拎幾多。芝士煙肉焗蠔，蠔夠晒大隻，肥嘟嘟咁非常飽滿，一啖咬開蠔汁就出晒黎，鮮甜既蠔汁加配焗到微焦既芝士煙肉，咸咸地令蠔味更出色，我地幾個巴打都好欣賞呢個焗蠔，每人食左4-5隻，越食越好味！花之戀，三文魚夠肥美，蟹籽又夠多，入口蟹籽卟卟爆開，又鮮又甜。柚子芥末帆立貝，好特別既配搭，柚子甘甘地配埋嗆鼻既芥末，又唔會搶左帆立貝既鮮甜味道，出奇地配合，難怪成為no.1推介。火炙鰻魚，鰻魚肉質鮮嫩，經火炙燒過後味道更香，令鰻魚味更突出。今次主要都係食壽司刺身，壽司整體都非常有水準，刺身又夠新鮮，款式選擇又多，絕對性價比高。