大勝豬扒清湯腩

Open Now

Now Closed

YouTube 飲食男女好介紹：位於九龍灣得寶商場內Foodcourt嘅大勝豬扒清湯牛腩。肉餅飯餐價錢大眾化，肉餅薄煎好大塊，鹹香脆口，調味如配飯適中，淨食少鹹。而且生肉球顏色粉嫩，一睇就知新鮮。勁推加流心煎蛋，以蛋黃沾肉餅配飯一流，增加味道層次，入口會醇厚好多。個人唔鍾意太陽蛋嘅可要求反蛋，特別提醒唔要全熟蛋，少燶邊好正。另外，外賣咗清湯牛腩飯，南乳豬手飯，豬扒沙律茶餐返去做晚飯試匀signature items。（唔記得影相，sorr......😅）清湯腩嘅牛腩份量十足，白蘿蔔稍嫌唔夠冧但尚算清甜，湯好重胡椒味，同一般清湯腩嘅湯唔同。豬手飯老公食，但係冇乜comment。佢一直想搵返之前佢食過嘅一間台灣豬手，十分香軟入味，仲要炆到豬皮黏口。呢間似乎未達佢哋理想但係份量真係好足，見佢清盒又一大堆骨應該唔差，又抵食。豬扒沙律係下午茶餐，只需卅幾蚊，豬扒返叮都好好味，冇過鹹，肉質鬆軟，如果即場食會更香。沙律係我喜歡嘅港式薯仔蘋果沙律，啱我口味。整體價錢公道，味道都好好。呢間小店據悉曾喺美食戰場大角嘴營業多年，實力有返咁上下，下次會覆桌再去食。