金城餐廳 (Moved) New Location

行開去筲箕灣, 今次唔去食切腩片頭撈粗, 走左去同亞蘇介紹過而且係附近的金城, 試下佢地的焗豬扒飯加熱奶茶套餐($39)焗豬即叫即整, 唔會整定, 所以一定熱辣辣, 焗完過後醬汁面有點燶, 份量十足, 雖然係雪藏豬扒, 但呢度的卻無雪味, 又比較厚身, 肉質又比較'林'同鬆軟, 完全比坊間的焗豬的豬扒好食好多. 而且已經斬件,食起來都比較方便, 炒飯底乾身, 粒粒分明, 唔會有過濕或過油的問題, 茄汁唔會好假, 唔太酸, 唔會用太多蕃茄, 伴以適量紅蘿蔔, 洋蔥同西芹同煮, 起碼唔會有雜豆, 味道剛剛好, 食完十分滿足而熱奶茶方面飲落去感覺比較薄, 茶味唔算好濃, 奶落得比較重手, 亦唔算順滑, 而且茶唔係好夠熱, 對於我來講呢個問題比較大d, 所以奶茶真係一般茶記水準, 好一般!! 雖然環境麻麻, 但d亞姐都算有求必應, 服務不錯, 喜歡焗豬扒飯的, 值得一試架...