源記餐廳 (Closed)

今日往銅鑼灣時代廣埸購物，星期六人流都幾多，逛完百貨公司和超级市場，正值黃昏時間，天時暑熱，去茶餐廳食番個茶餐都係唔錯嘅選擇。剛巧附近有間源記餐廳，食客都幾多，等左一陣剛巧有卡位，馬上入座。叫了個下午茶餐，沙爹牛肉麵沙爹湯底夠味而不太濃，牛肉腍滑麵爽口，火腿奄列煎得很香口，雞蛋滑溜，煎得啱啱好。跟餐多士還可加七元轉配菠蘿油，十分抵食，難得菠蘿油一樣咁有水準，麵飽熱辣，牛油冰凍香滑，好啱胃口。當然要加杯餐飲凍鴛鸯，香滑不太甜，冰凉解渴，是茶餐廳特有嘅享受。