俺流塩らーめん (MOSTown新港城中心(4期)) (Closed)

俺流塩らーめん原來已經開到馬鞍山，係6-7年前已經係葵芳開始食。由2010年渋谷總店發展到香港已經十幾年，店主小林之前曾經喺唔同流派修業，北海道、横浜家系、九州、塩等等，最後創出俺流(自己Style)嘅拉麵。拉麵有兩款主打，塩拉麵同埋熟成塩拉麵，當然仲有加入唔同調味料或者配菜嘅變種。塩拉麵湯底由雞、豬骨同蔥煲成，熟成塩就係用高速煲將雞湯、肉碎、蔥將味道壓縮，因為以短時間萃取，令湯底特別醇厚香甜。就係塩湯咁醇厚嘅味道，今日揀咗人氣嘅鮮味蛤蜊濃湯拉麵。一上枱先聞到蔥香，大大堆蜆堆砌係麵上。先推倒飲湯。除咗有熟成塩湯嘅醇厚風味，仲多加蜆嘅鮮味，一啲都唔腥。蜆肉份量都幾多，數過有成14隻。呢度枱面有大量唔同種類嘅調味料，可以為你碗湯變口味，特別啲有柚子胡椒醬、黑蒜醬、梅子醬、辣油，枱上餐牌都有建議嘅組合。俺流除咗喺日本有拉麵店之外仲有餃子店，所叫多客餃子試吓，呢個明太子芝士餃子的確惹味。明太子咸咸香香加埋熱溶拉絲芝士嘅邪惡同碗麵成一大對比，但係都好好食。