木船泰國粉麵專門店 (Closed)

今日朋友話想食泰國野，就同佢入左呢間餐廳。一入到坐低個環境唔錯望落乾淨企理，座位都夠寬坐得舒服，裝修都好有特色，好似係船艙入面咁都幾得意。同朋友一齊3個叫左地道酸辣鳳爪，睇個名以為得鳳爪，原來係一大盤鳳爪沙律，鳳爪青瓜同蘿蔔絲配埋個酸辣汁，酸酸甜甜惹味又開胃。我地再叫多個炸魚餅，魚餅夠彈牙。主食方面就叫左燒豚肉飯套餐，一上黎就聞到好香炭燒味，豚肉燒得好嫩同埋多汁配飯一流。另外，仲叫左個香葉肉碎配脆脆雞翼套餐，肉碎調味夠濃好惹味，雞翼炸得好好一啲都唔油膩，食落夠香脆肉又夠juicy，兩個套餐都會有三款小食，泰式春卷、朱古力蛋糕、沙律仲有鮮雞湯或者冬陰公湯，唔過百又有湯主食同小食性價比超高。飲品就加錢叫咗個椰青同埋青檸梳打。椰青新鮮同埋清甜，青檸梳打夠酸夠爽。總括黎講呢間餐廳野食好食，份量同價錢成正比，推薦推薦!!!