UCC Coffee Shop (Closed)

難得今日放工可以同同事去食飯，我哋就去咗寶林新都城嘅UCC Cafe食，我哋已經係第二次幫襯，依然都係咁鍾情呢間餐廳。每次我哋黎都會叫卡邦尼意粉，我好欣賞醬汁，唔會太流，而且香口，超級好食，平時係其他舖頭食嘅卡邦尼意粉通常都會煮得太流，食幾啖就會唔想食，相反呢碟意粉嘅醬汁就煮得啱啱好，可以成碟食晒！我哋仲叫咗漢堡扒蛋包飯，漢堡扒有香濃嘅洋蔥味，非常香口，而且醬汁係蘑菇汁，食落口有一陣陣蘑菇味，而且唔會太鹹，同漢堡扒好夾，配埋蛋包飯食，非常一流！另外我哋仲叫咗芝士焗雞肉飯，餐廳做嘅焗飯非常好食，芝士汁唔會太流，而且香口，配埋炒飯底，好味道！我哋仲加左錢叫沙律食，我哋自己攞碟出去裝沙律，可以一次過裝滿成個碟，所以我同同事都好興奮，鬥邊個裝得最多沙律。沙律嘅款式好豐富，有粟米、蕃茄、生菜、薯仔、紅腰豆等等，好多選擇俾你揀。