大和豚総本店 (Closed)

早排約朋友食飯, 去咗喺旺角雅蘭一樓有多國菜可以食嘅大和豚総本店dinner. 本身以為有大和呢兩個字, 就以為係日本餐廳, 但原來唔係。平日夜晚7點幾到, 門口唔算多人, 等咗未夠1分鐘已經有侍應帶我地入座。餐廳嘅座位都幾闊落, 而且張枱都幾大, 可以叫好多野食又唔會太迫。叫咗個138蚊嘅吉列豬扒飯set, 跟餐連一碗味噌湯同埋前菜。前菜用有三格嘅小碟裝住, 分別有三文魚、泡菜同埋醃青瓜粒。三文魚唔算太新鮮, 但以前菜質素黎講可以接受, 味噌湯同泡菜亦都一般, 反而係醃青瓜粒幾有驚喜, 飯前食幾開胃。主角吉列豬扒飯塊豬扒好大塊, 佢用咗面包糠而唔係一般炸粉同炸漿去炸, 所以包住豬扒嘅外皮唔會太厚, 亦無搶咗豬扒嘅肉味。建議豬扒要連埋生菜一齊食, 可以解油膩。飯量太少, 可能豬扒送飯好快將塊豬扒食哂, 只食豬扒會有少少乾。店員服務態度唔錯, 環境以旺角鬧市嘅鋪頭黎講算比較好, 加上有唔同款式嘅野食, 呢間餐廳可以試。