華星冰室 (京瑞廣場1期) (Closed)

好多年食過銅鑼灣果間嘅「常餐」覺得麻麻地。今日經過見到都諗左陣先決定試多次，諗住咁多年點都有啲改善掛。點知今次更失望。我都係食「常餐」。但問題如下：多士：算係成個餐最好食，但無乜牛油香味，作為厚多士，廚房搽牛油唔搽啲「角位」。但我地食厚多士第一口必定由多士的「角位」開始食。睇得出整包嘅有啲求其。但低處未算低....火腿炒蛋：一望啲炒蛋，散晒好似爛晒咁，見到已經唔開胃。一食落去全部都係油，係油浸蛋多過炒蛋。炒蛋身為重點嘅食物最令人失望。叉燒意粉：意粉好硬，明顯煮得唔夠熟。叉燒仲係有陣雪味，仲有肥膏痴住，食兩口已經唔想食。完全無叉燒嘅香味。總結：比好多年前更加難食。完全無heart去做。而仲要收48蚊唔平，我情願坐車出去食澳牛仲覺得值得。唔會再食華星。