九井壽司 (Closed)

今日係Megabox 行街，見到9樓有間日式餐廳睇落去好似幾高質，所以就決定試一試。叫左三文魚刺身同三文魚腩刺身，依度嘅剌身好厚同鮮甜，尤其係魚腩，佢嘅油脂分佈均勻，食落去超好味，推薦食魚腩刺身。叫左濃芝士軟殼蟹卷，手卷比想像中大舊好多，作為芝士控，見到手卷上面加成塊芝士完全係無法招架。入面嘅軟殼蟹炸到好香脆，成舊咬落去除左感受到芝士同沙律醬嘅甜味，仲有炸物嘅香脆，食落去有好多種口感。叫左火焰芝士鰻魚壽司同熟蝦壽司，見到Menu張相咁吸引，令到人都好想試吓。雖然佢地只係普通嘅壽司，但係上面嘅芝士係燒過嚟，食落去有少少燶燶哋嘅味，令到成個壽司生色不少同令人難忘。叫左碗鹿兒島醬燒豬軟骨烏冬，依度嘅烏冬完全可以媲美出面嘅烏冬店，豬軟骨除咗好入味之餘，啲骨仲要軟到好似食緊啫喱咁，而湯底用咗豬骨湯，又係好鮮甜同埋濃味，加埋彈牙既烏冬，簡直係必點之選。除左食壽司同烏冬，都叫咗個炸物，就係唐揚炸雞，因為唔太夠喉。依度嘅雞塊都大大粒，而且係即炸，咬落去仲會有啲肉汁bi出嚟，算係CP值高嘅一款食物。