小包包 (Closed)

我係慕名而來嘅！其實又唔係特登，咁啱嗰日係中環同朋友食午餐，就嚟到12點又未諗到食乜，去到PMQ附近，我就醒起一路都好想來呢度試吓，朋友又唔反對就過嚟試下。真係好好彩，因為未開店嘅關係，前面只係有幾個人排緊隊，我哋都嗰陣已經12點，所以排咗幾分鐘就可以入去，我實在難掩我興奮嘅心情，但係最近食量真係細咗好多，所以我決定一人只准叫一個包！Pork belly - 招牌果然係招牌，冇得輸！豬腩肉燒得啱啱好，肥瘦均勻，配上香香辣辣嘅醬汁，仲有洋蔥，葱同埋菜絲，係超好食！連平時唔會食肥肉嘅朋友仔都大啖大啖話好好味！Scallion chicken - 真心驚喜！我揀咗佢冇揀到天婦羅炸魚，實在係聰明！佢嗰件炸雞真係炸得超好味，有肉汁嘅炸雞真係唔知去邊度揾！佢件炸雞仲要係有厚度，你要個口好大先至咬得到佢件雞，你想唔想像得到個滿足感有幾大？將畫龍點睛嘅地方係佢嘅醬汁配上左姜容，葱同埋大量椰菜絲！超級超級好味！間店有幾大一眼睇晒，不過天氣真係好熱，一路食啲汗都冇停過，不過佢嘅包包真係做得好好味，我一定會再返嚟幫襯！