三多 (Closed)

日期：9月1日人數：3人三多已經開咗好多年，亦都有唔少分店。幾年前有一排我都經常幫襯旺角嗰間，滷水雞髀同埋香辣肉碎炒腸粉都好好食，但後來好少去了。兩個禮拜前周末，帶我屋企人去試吓。由於大埔總站未開門，所以改去太和呢間分店。位置有啲偏僻，要行一行先搵到。三個人叫咗一隻炸雞髀，一隻滷水雞髀，一份小食拼盤，同埋一杯爆檸（檸檬茶加爆珠）。炸雞髀同滷水雞髀都好好食，雞髀大大隻，其中炸雞髀好脆口，裏面雞肉好滑。滷水雞髀就好入味。食雞髀嗰陣都有食埋雞皮嘅衝動，但最後自己理智制止咗，只係食咗少少。雞髀係可以配飯、意粉、或者薯菜，但我哋唔肚餓，所以冇加到。小食拼盤入面，最好食都係炸魚旦，其他都係正常水準。爆檸夠晒凍，透心涼。店內環境一般，衛生環境正常。餐廳入面有洗手間，算幾好。堂食設有最低消費，每位$29，即係每人最少食一隻雞髀。