茶餐廳2.0 (Closed)

同朋友黎左黃大仙呢邊行下，搵個地方食野兼吹下水，到左茶餐廳2.0，餐廳幾大仲有室外坐位，大部分食客都揀坐外邊，天氣好確實係舒服喎。坐低睇下餐牌，點左一人一份午餐，先食飽個肚再講。午餐奉送餐湯，紅湯係羅宋湯，幾濃郁蔬菜味好飲喎。白湯係蘑菇湯，幾滑調味唔錯。餐飲點左熱奶茶，茶香奶滑又夠熱，好飲。點左個B餐土魷蒸肉餅，上枱時係熱辣辣的。肉餅幾大份，入面有魷魚同馬碲，調味啱口味。另一個係肉醬焗龍脷柳意粉，好大碟呀。芝士下得很多仲可以拉絲添，肉醬酸酸地仲落左香草，龍脷柳大大塊夠滑溜，意粉軟硬適中好味。食完正餐傾下偈，見坐左咁耐不如叫下甜品，點左下午茶的是日精選蛋糕，係榛子朱古力蛋糕，甜甜地又綿密，正呀。仲加左份特厚鮮牛油花生醬西多士，即點即做好新鮮，舊牛油慢慢溶緊㗎。超多花生醬，麵包香脆，點埋糖漿超好味！下午茶的餐飲再要多杯熱奶茶，另一杯就要左熱檸茶。食左咁多野都唔使一百蚊位，抵食呀。平日下午人不多，食下野傾下偈真係唔錯。