橘焱胡同燒肉夜食 (Closed)

聽閒胡同呢間餐廳服務好，會有專人幫你燒烤而且食物質素又好，仲要係台灣過黎既，所以就同埋朋友一齊黎試下。入到餐廳職員見到我地拎住手袋就問我地需唔需要寄存，很貼心。坐底就開始點菜，如果喜歡食牛肉嘅朋友呢道會有好多選擇，佢地嘅厚切翼板肉和牛舌都好出色。豬肉方面我地就點左霜降松阪豬、上等五花肉、梅花豚肩排和大頭腸。其他肉類我們點左雞肉類，椒鹽雞軟骨、焱烤掌中寶、焱烤手羽先。另外佢地仲有羊架，可惜無哂貨，因為每日供應數量有限，所以今次食唔到，惟有等下次機會。海鮮方面我地點左扇貝、大草蝦、蟹膏生干貝和鯖魚，鯖魚唔係係我地爐上面燒，係佢地用炭烤，烤好就俾我地食。而蟹膏生干貝就生食，好新鮮！蔬菜類我哋就點左波特蘑菇和山藥，真係估唔到燒山藥會咁好味，平時食山藥個口感好滑潺潺咁，但燒完出黎好爽口感好似薯仔。我地食完一碟之後再追加多一碟。最後食到咁滿足我地都想試下佢地啲甜品，點左佢地推介嘅托斯特芋泥卷。呢個卷係用麵包捲住芋泥，一啲都唔會滯，麵包有啲脆口，再有煉奶同朱古力醬淋係麵包外面，味道就更加好味。重點係有專業服務 唔洗怕自己燒得太生或者太熟 佢地既專業識得用大火細火只要坐係到等食就好 very good