牛陣 (Closed)

今日同班朋友仔去左牛陣到打邊爐,好開心呀!可能我地果日太早食,所以唔駛等位就有得入去食。一坐底,就點左個鴛鴦湯底。爽啊!見到一紅一白就覺得零舍開胃。最正嘅都係佢個豬骨湯,白雪雪,一睇就知煲左好耐先會有咁既顏色。個湯開始滾起時,牛肉就上枱,時間岩岩好。牛肉色澤好靚,好鮮紅,肉質都唔差,唔會食到根或者渣。其他配菜就不過不失,比較特別既係我試左佢地嘅咖喱飯,真係幾好食,好有咖喱味而且又唔會辣,就係日式咖喱既味道。估唔到佢咖喱飯既水準居然可以同出面專食日本咖喱既餐廳有得揮,連飯既軟硬度都岩岩好。呢間餐廳整體質素都唔錯，就係有一位侍應，每次叫佢時，佢都好似睇我地唔到咁,不過其他人都算積極。所以,呢餐飯食得都好開心。