旅鍋火鍋私房菜專門店 (Closed)

今次同朋友一齊嚟到尖沙咀嘅旅鍋私房菜專門店打邊爐，環境真係好有特色，以機場同旅行✈️做主題，睇得出係有心思設計。仲有一條電梯通道，可以俾人打卡，令人非常放鬆～先講個湯底，海南椰子雞🥥好比到驚喜我。我本來以為係少少幾塊雞做湯底，點知上咗成隻雞，搞到對食量大失預算，唔覺意點左太多。椰子雞湯味道清甜，好解渴，可以就咁飲。放晒全隻雞同埋其他材料落去，令湯底更加鮮甜。我哋叫咗250g 新鮮手切牛頸脊，佢呢晚做緊半價優惠，啲牛鋪到成個圓碟滿晒，十秒就啱啱好熟。 我哋嗌咗一人一隻鮑魚，上網睇要煮5分鐘先熟，熟啲比較放心。鮑魚好爽口，好易就咬開，唔會好韌，值得推薦！手工響鈴非常之脆身，唔驚浸耐左會好淋。 手打蟹籽墨魚滑好彈牙，而貢丸嘅豬骨鮮味十足，冇咩頭緒嘅話可以點呢兩款試下。雜菜拼盤主要包括生菜、娃娃菜，同埋蕃茄。我哋將蕃茄一早擺落湯度，增加湯底嘅鮮味。萵筍片越煮越淋，唔想咁淋的話，要盡快拎起嚟食，會食到爽脆口感。飲品方面，餐廳本身都有熱茶供應，但係我哋想試吓啲特別嘢，所以就叫咗自家製菊花茶同夏枯草，都非常清熱氣，適合打邊爐飲。下次多啲人嚟就可以坐喺房入邊，傾得大聲都唔會嘈親人。